如果要用一幅畫來形容 MOON TANG，她給我感覺就像是一幅日落長灘的畫。灘上吹著微風，而裡面赤腳坐在岸線，海水剛好拍打到雙足的小女生就是她。22歲，剛剛在理工設計系畢業就出道的新生代音樂人 MOON TANG 視音樂創作為一個自我對話的途徑，她的歌曲沒有警世的歌詞，更沒激昂的旋律，反似是柔中帶剛的綿拳般攻入人的心臟，讓人時而自我懷疑，寂寞難過；時而堅強自信，充滿希望。
我大膽在訪問前兩天才提出現場演唱的請求，MOON TANG 爽快答應了，現場拍攝時，個子嬌小的她穿起香港針織品牌 YANYANKNIT 表演自彈自唱，聲音輕柔騷靈，略帶 BOSSA NOVA 的慵懶甜美和簡潔輕快，有著神奇的穿透力，現場的拍攝團隊不約而同地搖擺起身體。
Dear moon, Do you ever listen to my thoughts?
Dear moon, I’ve been waiting for you for a million light years
Dear moon, Am I the brightest? Or am I just one of them all?
一切都從一次哥本哈根的旅程說起。
MOON TANG 何時開始發現自己對音樂的興趣？又是何時開始嘗試創作？
我係MOON TANG。今年22歲，啱啱理工設計系畢業！不過設計唔叻，所以走咗去玩音樂。由細到大都習慣自己一個，冇人同我玩，音樂就成為我自娛嘅途徑。成日喺屋企自言自語，模擬日常對話係一場音樂劇，慢慢唱歌就變成我第二個語言。開始創作係因為去哥本哈根太休閒，然後發現只係翻唱人哋嘅歌已經冇辦法填補心靈嘅空虛，覺得唔係自己100%嘅想法，所以就嘗試將自己嘅感受寫出嚟。
最新的專輯《DEAR MOON》靈感來源是什麼？
靈感來自於寫日記嘅習慣。呢個專輯所寫嘅小煩惱都係取材於日記內容。因為從小就唔太喜歡分享自己嘅問題，發現每個人都忙於解決自己嘅煩惱，冇人可以設身處地咁聆聽別人說話，所以我就開始寫日記，因為自己係自己嘅最佳聆聽者。《DEAR MOON》就係我寫咗一封封信比自己咁。
知道你曾去過哥本哈根交流亦在當地創作了不少歌曲，有那一首最能帶你重遊當地的記憶？
GET LOST。係我第一首喺哥本哈根寫嘅歌。我記得嗰日唔駛上堂，天氣停留喺夏天同秋天之間，陽光同微風嘅結合令我想出去踩下單車。當時唔知道自己要踩去邊度，完全沒有計劃，淨係好想趁呢個好天氣好好咁重新觀摩呢一個城市。之後踩下踩下就去咗哥本哈根嘅一個沙灘，嗰日嘅日落係淺粉紅色嘅。我返到屋企就寫咗 GET LOST 呢一首歌去記錄一下，沒有計劃最終都會去到一個終點站。唔需要介意自己迷失，可能你迷失的過程就係你嘅終點站。
可以介紹一首最能代表自己現狀的歌嗎？想說的故事和情緒是怎樣？
SMOOTHBOI EZRA / MY OWN PERSON
呢首歌每一句歌詞都好RELATABLE。每隔幾個月就要自我懷疑一下，宜家就正值呢個狀態。無論做咩決定都好似唔啱咁，對自己冇咩自信。迷失咗好多年都未搵到自己，想放棄了。
用三種顏色形容一下自己的音樂？
黃色 + 藍色 = 綠色
黃色代表我喺迷失之中不斷尋找自己 (POSITIVE)
藍色係當我遇到好多唔同嘅挫折，感到抑鬱 (NEGATIVE)
最後綠色係大自然嘅顏色，代表一種內心嘅平靜。
我覺得我嘅音樂同我創作嘅過程就好似呢一個LOOP咁，不斷浮走於自我懷疑同自我肯定之間，最終其實都只係想追求一種內心嘅平靜。
在音樂路上，你擁有屬於自己的啟蒙者嗎？
我覺得我喺音樂嘅路上遇到每一個同伴都對我有一點點啟蒙。最大啟蒙者係嗰啲話我知音樂是怎麼一回事的人。令我知道音樂唔係只係唱歌，舞台亦都唔只係屬於歌手。佢哋都令到我懂得享受喺台上玩音樂嘅嗰份純粹。
最喜歡的歌手或藝人又是誰？為什麼？你在他身上得著最大的東西是什麼？
每次有人問我呢個問題，我都十分掙扎，因為我欣賞嘅人太多了，好難從中選擇最喜歡嘅一位。不過佢哋都有一個共通點，就是佢哋每人都有一份無可取代嘅特質同個性。例如我經常提及嘅 UMI，一個十分自由的靈魂，十分相信宇宙能量為他帶來嘅一切。或者LIZZY MCAPLINE用佢簡單而細膩嘅文字，寫出自己最真摯嘅感受係歌曲之中。REMI WOLF 完全擁抱自我的狂野，200%從音樂與視覺上表現瘋狂之極。用獨特的方法去我表現自我的人，我都十分欣賞。
如何認識 GARETH？在音樂合作和生活上，你和他的關係又是怎樣？
IG一直有互相 FOLLOW，由我 YEAR 1 開始已經知道大家嘅存在，不過從來都冇咩交流。直我去到哥本哈根，多咗時間喺IG分享自己嘅音樂，GARETH 就發現「咦！呢個女仔唱歌都幾好聽喎（只係幾好）」，所以就邀請我同佢寫歌啦。我同佢一直都冇成功寫到一首歌。我哋從聽嘅音樂到待人處事嘅方法都好唔一樣。一凹一凸嘅狀態，令我哋突顯左大家嘅優點，亦都放大左大家嘅缺點，長期都互相學習緊。
你的作品予人輕柔、童話、浪漫的感覺，你希望你的作品會為聽眾帶來怎樣的體驗或信息呢？
我冇咩盼望。究竟我嘅作品會帶來點樣嘅體驗或信息係由觀眾來告訴我的！
音樂對你而言的重要性有多大？你能想像沒有音樂的世界嗎？
音樂對我而言，就好似我雙腿。佢帶我走過好多好多嘅路，遊歷過不同嘅人和事。十分幸運我擁有呢雙強壯嘅腿，令我可能比其他人跑快幾步，走更遠嘅路。
不過我都勉強可以想像沒有音樂的世界，因為返左呢雙腿，我仲有我雙手、我雙眼、我雙耳去繼續感受這個世界。沒有音樂嘅世界，我仲有藝術。只要我一日有思想，我相信我都會搵到音樂以外嘅途徑去分享我嘅故事。
有人說過香港是個太擠壓的地方，導致難以思考自己的身份，思考創作，你又認同嗎？
我十分認同。喺哥本哈根，工作以外還有生活。
喺香港，工作就係生活。好多人都冇時間做工作以外嘅事情。有自己嘅興趣或者係陪家人嘅時間都好難，完全冇容納思想嘅空間。所以我返咗嚟之後，創作的確沒有之前那麼順暢。係香港休閑是不正常的，每個人都好忙。所以我都學習點樣留返多啲空間比自己。
音樂路上最大的滿足感是什麼？
應該係沿路遇到好多音樂嘅同伴。因為我個人比較內向，如果冇音樂，我都唔會遇到咁多咁好嘅朋友，咁多我值得學習嘅榜樣。
那遇過最大的困難或瓶頸嗎？
最大困難係搵到適合自己嘅聲音。始終寫歌對我來講係一樣新事物，我需要時間去練習同探索。究竟乜嘢類型嘅音樂適合自己，同埋乜嘢聲音最可以表達到自己。
今期我們的主題是「PEACE, PLEASE」，對你而言「PEACE」是種怎樣的狀態？你會希望你的作品能帶給人這種感覺嗎？
PEACE 對我而言係不斷嘅 WAR。徘徊喺成功與失敗之間，你先至會真正明白到如何達到 PEACE OF MIND。要經歷過WAR先至會了解真正嘅PEACE。我希望我嘅作品會喺人們AT WAR嘅時候得到少少嘅動力去追尋自己嘅PEACE。
就當這一期的 MING’S 是你的時間錦囊（請好好收藏）對未來五年有什麼目標嗎？
沒有什麼遠大嘅目標，只希望你五年後過得好好的！I HOPE YOU’RE CLOSER TO WHO YOU ARE BORN TO BE!
RELATED ARTICLES:
Comments