今個聖誕，你安排好節目了嗎？對於這個象徵關愛與溫暖的日子，大家也期望能在笑聲中度過，有人選擇安排連串活動走場party駁party，或與知心老友一期一會，對於過節，大家各有喜好。上月才剛出征冰島演出，凱旋回歸的本地女子樂隊雞蛋蒸肉餅（GDJYB），並肩作戰的背後，原來從來都唔興一齊過節。聖誕對她們來說，是有另一種意義的。
雞蛋蒸肉餅 本地女子Math Rock樂隊（左起：結他手Soni、主音Soft、低音結他手Wing、鼓手Hei Hei）
On Wing：純銀心形吊墜頸鏈 $5,050
On Soni：純銀心形吊墜頸鏈 $6,250
（Both from Tiffany & Co.）
各自精彩
成軍五年，GDJYB各成員早有默契，練歌、吃喝玩樂已是例牌日程，去到過節，反會選擇分開度過。「大家冇一齊過，只會各自約最close的朋友。」即係成員之間唔算「最close」？主音Soft帶頭解釋，夾band日見夜見，好難再有「激情」，大節流流，大家倒不如騰出時間去搵舊朋友，這也是時間管理的其中一門技巧。而鼓手Hei Hei喜歡跟中學好朋友聚在一起，食飯行街傾偈去露營。「由細到大都知聖誕節是紀念耶穌誕生，其實，跟自己無關，不過就係一個好機會跟朋友聚頭。我們最鍾意去露營，仲會為營地佈置一番，加添氣氛。」不似得還是學生的bass手Wing，假期回憶都是埋首苦讀，相比之下，Soft的派對體驗好像精采得多，「最記得中學時代，例必去沙灘BBQ，一大班人吹水玩通宵，主要係唔使返屋企！有年參加朋友的天台BBQ party，為數幾十人，大部分都係文藝青年、手作人或designer，大家朋友帶朋友，有人唱歌、有人傾計，幾開心。」大家也好客，何不因利乘便，索性在band房搞個小型party？說穿了，大家都怕煩，玩樂之後，收拾殘局最攞命！各人紛說「咪搞」。
小禮物交換笑聲
無論一大班人或是小圈子三兩夥伴，總有一些聯誼的小遊戲，聖誕節交換禮物實為指定動作吧。「交換禮物只求開心，聖誕節唔係一個收禮物的日子，我們會將價位set到好低，大家買回來的禮物，搞笑為主，試過收到10蚊一個矮瓜！我個人最怕收到『絕交三寶』：相架、水杯、曲奇餅。」Hei Hei認為送禮的驚喜，得啖笑。再離譜的是Wing收過MacBook原裝紙盒一個，包裝起來還以為執到寶。Soft反而將注意力放在遊戲方面，相當投入，「有次跟朋友定好dress code，每人只穿一種顏色，我抽中綠色，而當晚大家都收到跟自己一樣色的頭套做禮物，企埋一齊就成為五星戰隊啦！」
作為樂手及主音，會不會隨時被朋友情商即興表演露兩手，搞氣氛呢？「有機會聚頭，大家情願霸住電視打機，或者靜靜地傾下計，珍惜相聚時間。」
去冰島演出，四人順便玩了一星期，感受到早來的聖誕氣氛，樂而忘返。
感受聖誕
剛在冰島參與Airwaves音樂節表演，今次，可說是跳級達到她們的wishlist終極目標，也令GDJYB感受到跟香港很不一樣的聖誕氣氛。「那次表演完，我們順道遊覽英國，發現倫敦在11月已經滿街聖誕佈置，在我們住的酒店，差不多每晚都有party設有live band表演，天氣雖凍，大家仍心甘命抵穿戴靚靚出去玩。」 Wing還說，這種氣氛令到大家的投入程度，直逼我們的農曆新年，同時也令Hei Hei想去德國感受另一種濃烈的聖誕氣氛，「聖誕節一直讓我有一種孤獨感，好想去德國，體驗當地氣氛，作為一個聖誕起源的地方，感覺應該會很不同，或者會改變我的睇法。」面對滿街佈置裝飾，令低調的結他手Soni有所反思，「見到各大超市陳列着各種聖誕佈置精品，令我聯想到用完即棄的環保問題，我覺得，佳節背後也應該好好去思考這個全球性的問題。」
在冰島Airwaves音樂節中演出是GDJYB音樂上的終極目標，觀眾反應熱烈令她們更期待到不同地方演出。
Comments