（男）Master Ultra Thin Moon超薄大師系列月相腕錶玫瑰金款 $132,000
（女）Master Ultra Thin Moon超薄大師系列月相腕錶玫瑰金款鑲鑽版 $164,000
Both from Jaeger-LeCoultre
TIMELESS COUPLE / JENNY & BRANDON
已故大律師周啟邦獨生子周國豐跟太太黃泳霖，快要踏入結婚八周年。想當初，周生用了一整年時間去追黃小姐，由英國追到返來香港，女方理由簡單，「大家性格差太遠，怕唔夾。」時間證明，這想法杞人憂天。現在，二人育有兩子，一家四口視為一個單位。周太當日判斷有誤差，幸好仍勇敢踏出第一步，始有今日豐收，補番條數。
夫妻同為大律師，思維模式邏輯理智，製造驚喜浪漫特備節目，多為男方負責，然而，Jenny一出手，Brandon冧到暈。「佢唯一做過比較稱得上surprise的——我讀完master回港，準備自己搬開住，佢先去新屋安頓好事情，再留低一張張字條，要我之後跟住每張字條找回每件物件，好似尋寶，又搵到禮物、又搵到食物，幾sweet，idea幾好。」
時間讓兩個看似「大纜扯唔埋」的人走在一起，想法也愈加接近。Brandon說，欣賞太太「率真的一個女人，有嗰句講嗰句。」遲來訪問的Jenny未知老公看法，逕自回答，她覺得老公「正直，對人真誠。」幾乎一樣！Brandon笑說：「我哋無夾過呀！」他們就拿着這些儲回來的默契，向前走下去，「我們好早生小朋友，二人世界的時間很短，希望小朋友長大之後，兩個人可以自由自在去做自己想做的事情，甚至一起讀書也好。」Jenny認真地說。
快點變回我們二
論性格，他們女的動、男的靜。論外型，Brandon形容初次認識太太時，她一身爛牛襯一個爆炸頭，好rock的模樣，「未箍牙，仲有爆牙。」這跟自己十年如一日官仔骨骨，南轅北轍。當時，他們在英國讀中六，「覺得這個女仔幾有趣、幾有型，追極都追唔到，這一年去到最後，我跟家人留在英國過節，Jenny返咗香港，爸爸見我日日悶悶不樂，一聽到我話要追女仔，即二話不說帶我飛回香港，一落機，我唔理穿着T shirt牛仔褲好求其，直衝佢屋企，問佢：『可否做我女朋友？』。」女方被嚇一嚇，回復冷靜後，馬上答應。「我做人就是抱着打不死精神，佢覺得我哋性格好唔同，但我想法簡單——試到得為止！」Brandon一臉自信。
現場所見，一個設計甫士、一個提點細節，一個瞥見積家錶、一個旋即想起相關朋友，極有默契。Jenny坦承，這一切也講求磨合，「我個人比較心急，佢偏向諗清諗楚才下決定。開始時，我好容易frustrated，漸漸才找到相處節奏，體諒最緊要。我諗過，當初若果搵一個跟自己性格差不多的人，會否更好？諗深一層，到時可能火星撞地球，仲worse。」
第一次認真
「Jenny是我第一個正式女友，可能整定，我們中間經歷不同變化，加深了點契，關係已昇華，不是單純地鍾意，現在，她既是我老婆、愛人，也是我的好朋友和soulmate。這種關係，一定是大家一起經過起跌，互相扶持、鼓勵之後，才建立得來。」
你要愛我就是我
「我日日穿西裝，星期六都要穿西裝褸，唯星期日才唔穿！依家佢已經唔理咁多，我亦從來唔會問佢點睇我打扮，我有自己睇法，揀禮物都揀自己鍾意的東西買給佢。我明白自己喜歡的東西，未必是主流，但大家口味似乎愈來愈接近了。」
第一次嘈交
Jenny：「第一次拗交，因為佢遲到！開頭拍拖，佢成日遲半個鐘，我覺得準時應該係基本嘛！佢依家當然守時好多啦！你仲記唔記得呀？」
Brandon：「依家我九成會早到，當時遲到，斷估係跟司機有關。」
為你改變的媽媽
「So far我們從沒因為小朋友而拗過交，我們都很一致，都很嚴厲，但，我會提點Jenny不要太惡，嚇親小朋友，依家佢會話：『你鬧啦！我驚自己太勞氣。』。」
佢唔嬲得咁多
Jenny：「以前的衝突極度dramatic，依家，calm得多，大家已找到平衡點，永遠都由小事引起紛爭。」
Brandon：「永遠都係有人心情唔好！」
Jenny：「佢氹我多啲，我一聽佢講sorry就ok，係咪先？」
Brandon：「好多女人鍾意嬲幾日，佢唔會。」
Comments