Wyman Wong：買嘢買到……福岡

把這一篇當作抒情文看，不要當是購物天書，OK ？

為什麼是福岡？

原因一，我家有個小傳統，十幾年來的聖誕都在東京過，當然，此外四月八日左右再各去一次也是「定番」，但預計不到的是，無端端今年因為工作關係，又返多了4次「鄉下」，最後一次還是12月中，新陳代謝快如東京也難再有未逛的街給我們消磨了，但平安夜又捨不得太平安地留在家中，便得在日本另找一個落點了。

（在此補白一段劇情：大阪我是不夠喜歡的，這個亞軍和冠軍並非輸個馬鼻。我在大阪的唯一節目，就是逛那些在東京過門不入、其實不屑逛的店，因為在這兒不將就一下也就沒其他東西可逛了！

至於京都，shopping指數普通，但有濃厚的地方風情搭夠，是OK的！不過也不能太常去，至少得兩三年才一次吧！）

好了，講原因二了，日本咁多個城市，做乜千揀萬揀去福岡？其實是因為：「李嘉欣話去得過」，嚴格來說，不是大美人親口對我講的。係「吳君如話連李嘉欣都話OK」的，我就信了！有乜依郁其實應該賴三姑！

福岡印象（ 模糊版）

想想其實我不是未去過福岡的，廿幾年 前聽另一位有江湖地位的超級日本迷朱祖兒演 繹對這片新大陸的驚為天人，鍾意到借頭借路 要帶彭羚去拍唱片封套，年輕而旅行賀爾蒙旺盛的我，便決定信一信專家，不怕沒有香港直航的曲折，也無懼零個朋友肯陪我去旅行資料近乎空白的山旯旮，便搏一搏自己一個人探險 「不毛之地」，結果去旅行好少病的我（touch wood）， 一check in酒店便頭暈身㷫，啪了成藥更是出不到房起不到牀，一病病到原定check out嗰日便啱啱好返，真係吹漲！

所以明明係去過福岡但其實又未去過， 完全未行過呢度啲街，唯一出過酒店是因為瞓到第二日半夜兩三點，兩日未食過嘢勁肚餓但又唔捨得叫room service的年青的孤寒的我， 便腳步浮浮摸出酒店行了四五個街口去摸酒店 職員指引下那家LAWSON三文治飯糰充飢，當時唯一印象，是那家LAWSON的logo和東京不同，是舊版未update的……當下直接宣判了這兒一定是首都時尚威力照射不到的鄉下地方。

廿幾年後，因為李嘉欣，不，吳君如一句話，貿貿然訂了福岡機票（因為太遲才訂，所以上網時去了幾個網站都發現聖誕旺季只賣剩兩張機票一間房，好怕走雞，便衝動訂咗飛先！），之後才去做research，然後越睇越驚的是，好似無乜邊個網頁介紹的店舖和景點夠吸引……四圍問去過的朋友，有一半以上的評語是「嘩，我諗你一定唔得！」。

我開始好擔心，如果我還有頭髮的話，一定一夜之間甩了一半！

福岡印象（ 實戰版）

反正Google那麼方便，我就不一一把我 認為OK的shops和節目列出了，我只想說， 整體印象，於我福岡比大阪高分很多，但前提是「不可以在市區逗留多過三天」。

或者換個方法表達，如果你當佢台北咁去三日兩夜，是極好的，以後那些星期五或一 放埋啲long weekend可以多個選擇。

首先，福岡飛得短，機場離市區又近， 因為並非最旺旳目的地所以移民局那條隊又唔長……總之我這次抵步那天，下午未夠兩點已 check-in咗酒店「他他條條」行緊街！

然後，這個城市逛街的地方很集中，就是博多的商場羣和天神的百貨公司陣（連同其鄰近小街的潮區）兩大陣形，省了走來走去的交通時間。貨品當然不及東京選擇多（不過都有成間無同三星合作嘅真Supreme㗎吓），但我卻覺得揀得比大阪好！

東西好吃，而且比東京便宜，是出名的，就不多提了。

如果有多於兩三天，自駕或坐火車去九州其他縣市玩也是好多可能性。 唯一，不，唯二不喜歡的是，交通擠塞問題好像比我去過日本的其他地方嚴重，也暫時未找到地點裝修尺碼都夠令人滿意的酒店。但這個城市對我來說最吸引的地方是， 比起衝鋒陷陣忙過返工的東京，少啲街行但又不致完全無嘢睇的福岡相對就很好hea， 因為你想重現朝六築地朝十伊勢丹一直 shopping到晚八才食晚飯，之後晚十一再去Tsutaya或者驚安之殿堂玩到朝一朝二朝 三的節奏，亦根本無咁多嘢你玩，所以是個chill out 啲嘅Tokyo，咁，又係另一種好！