鄭秀文：我正嘗試學習拋開「鄭秀文」〡三月號

做得到做得好

今日是3 月8 日婦女節， 《 MING’s 》獨立號正式面世。

香港女人是幸福的， 基本權利齊備， 有心有膽自能創造一片天。

近幾年的鄭秀文奮力爭脫俗世枷鎖，成功尋回自我，一切得來不易，她也沒因跨過重重難關而放軟手腳， 歌努力唱， 戲努力拍， 自己過自己喜歡的日子，繼續向前行。寄語 Ming’s 「做得到又做得好」，她的態度對妳有沒有一點啟發？

如果瞓醒一覺香港人認不出鄭秀文， 你會即刻出街做乜？

去勻所有大牌檔掃街食嘢！ 其實行出街沒人識， 我絕對OK ， 去到日本都没人知我係乜水啦！ 如果一個人的生命時刻都要以幾多人認得自己為標準， 好危險， 很容易走入死胡同。人愈大愈要活出真正的自己， 不是世界認可你與否， 別人認識你與否， 應該活出自己想要的模樣。私底下的我，睇戲、煮飯、約朋友見面， 好平凡， 沒多大刺激。

如果今天鄭秀文變成鄭秀文助手， 你覺得最難搞的是？

最難部分應該係估鄭秀文想點！ 我的諗法成日變， 食慣某一種食物， 當大家以為我好鍾意， 突然有一日我就唔想再食， 永遠估我唔到！ 淨係對食物的喜好， 對於鄭秀文助手來講都好難好難估， 成日估錯， 比較難捉摸……

呢刻我想食花生醬多士， 聽日未必！ 工作反而唔難（ 估）， 我的喜好總有一個格式， 工作習慣真的好穩定， 工作前一定祈禱， 這幾年還影響了其中一個助手不再上香， 改為跟我一齊祈（ 禱）。

怎樣平衡工作與生活？

返工時， 人人用我工作的形象去思考「鄭秀文」這個人；「天后」已經是n年前的事， 依家唔興， 這世代有更多更新的天后， 只是某些人對於我， 仍然停留於昔日的印象而已。

當我意識到自己是幾咁平凡的時候， 這才是真正快樂的開始。以前成日想：「當我唔再成功的話， 會點呢？ 」當時抱着一個好大的不安全感； 依家不會了， 管你視我天后又好、凡人又好， 識唔識我都好， 我都是這樣生活， 這樣才能活出真正的自己， 你對我好咪好囉！ 你對我唔好， 我亦會繼續活出自己的價值， 這是人生最自在的時候。

近年的鄭秀文很努力拍電影。2018 年主演的電影題材取向明顯不同，為什麼？

不同階段， 選擇不同， 別人給我的劇本亦不同， 以前， 多拍愛情喜劇， 導演觀眾心中「鄭秀文」這個人， 彷彿已有一個特定 format ， 我等關錦鵬多年， 希望可以突破這個框架， 但不是你想突破就突破， 要等待時機成熟。《聖荷西謀殺案》將會是一個好清晰的分水嶺， 一個轉捩點， 阿關《八個女人一枱戲》更有一個煥然一新感覺，這就係自己一直追求的（ 轉變）。

愈來愈體會到作為一個 Artist  ， 一定要懂得等待， 時間慢慢過， 便會成長、進步。相隔十年再跟阿關合作， 自己在完全健康的狀態之下， 完全感受得到這個導演點解被譽為最懂得拍女人戲、幫助演員成長和處理一個角色； 我正嘗試學習拋開「鄭秀文」， 將角色該有的感覺表達出來。

恨攞獎得到同業肯定嗎？

斷估每個演員都唔會因為攞獎而去接拍某一些戲啩！ 我的際遇比較奇特，提名多次都落敗， 但這些經歷給我最大感受， 無論有獎或沒獎， 作為一個正式演員， 目標只有一個： 不斷向前行。以前傾向想證明自己， 依家唔使。也許多年來， 好多觀眾睇住我一直落敗， 好傷心！ 如果有一日我得獎的話， 一定上台逐一道謝， 因為暫時都還未有機會多謝大家嘛！

感到努力堅持的孤獨嗎？

孤獨感不是來自工作， 亦不是來自別人反對自己的堅持。孤獨每個人都有， 人總不想被遺棄， 才不停參與工作， 令自己繁忙。但我很喜歡孤獨的感覺。小時候好害怕承認喜歡孤獨， 怕別人覺得我好怪； 人活到現在這個階段， 定要 honest 承認每個人都不一樣， 你唔 enjoy 孤獨， 我真係 enjoy 喎！ 唔代表我奇怪！ 有時候， 遠離人羣， 享受一下獨處唔 Sharing 的感覺， 可以更認清自己。時時被人簇擁， 好攰！ 我享受孤獨， 享受自己處理困難的時候。

如果外星人來到地球， 你會怎樣介紹自己？

神的兒女。

作為基督徒多年， 你叫我上台講大道理就唔識， 反而我好鍾意做單對單的關懷祈禱服務， 自覺是我的使命。回頭想， 自己細個一直好想做一名社工， 人文關懷的工作， 依家有機會了。

我有一個夢， Set up 一個代禱團隊， 由我帶領祈禱， 暫時仍未想通怎樣推廣出去， 難道申請一個冧把， 大家有事就 call  我？ 唔係好得噃！ 所以暫時只在教會／ 友儕間進行。近日有親戚病重， 我也去了醫院一起祈禱。這是我十分清晰人生最想做的事， 不是工作更上一層樓― 倘若遇到好的工作機會， 我會做， 卻不會放得太重， 完成工作就馬上回饋人文關懷。我鼓勵大家， 當發覺自己內心跟我一樣， 分拆兩邊（ 一邊忙於日常， 一邊渴望服務別人）， 不要怕， 定要想方法實行。如果有一日， 別人在街上認出我是代禱 team 的鄭秀文， 嘩！ 一定開心過別人認出我是明星鄭秀文囉！

死喇！ 整個訪問好似傳福音， 好似唔係幾好㖭。