自由有代價！袁彌明：誰想講骨氣 最先必須有一些儲備

後生人人都想有自由。我以「用facebook的老嘢」觀察所得， 部分後生仔想要的自由是寧願搵少啲也不願過day-to-day朝幾晚幾的打工仔生活，寧願搵少啲也不願面對工作壓力。但那並不是真正的自由。

一大部分後生仔想做YouTuber，儲夠幾萬IG followers，拍片打機、拍片化妝、做直播廢up，齋收錢發達，邊個唔想？YouTuber、KOL一仗功成萬骨枯，一不小心成了鏗鏘集《P圖人生》女主角，人生技能得一項：高炒do嘴自拍，何來自由？

有一類後生想創業。（備註：去東大門買衫番香港賣，最多只能說是幫自己打份工。）要創業先要有本錢，不是本金，而是創意點子、驚人魄力、人際網絡、執行能力。我不是蠢鈍那種，但都要累積二十八年人生智慧方能穩步創業。

我唔會同你講「心境自由就是自由」的zen BS。 老生常談道：好多嘢錢係買唔到。人愈大就愈發覺好多嘢用錢係買到。有樓有無高潮我唔知，但有錢一定會有很大程度的freedom。「誰想講骨氣，最先必須有一些儲備。」要有自由先要經濟獨立，而想年紀輕輕便經濟獨立是需要付出異常大的努力。

最正路的方法不外是努力讀書，入間好大學，畢業後是你揀工而不是工揀你，已是邁向自由人生第一步。錯過了學業， 就必須必須必須努力工作catchup， 因為嫁個有錢仔都唔會令你有真正的自由。我剛畢業時番大公司打工，唔清楚自己做緊乜同做得好唔好。不如由37歲做了老細的我教番23歲初出茅廬的我「做嘢基本功」：

• 聽清楚你老細每句說話每個字。唔係話老細講嘢一定啱，但你一定要清楚老細想表達乜，想你做乜，背後動機係乜，理想結果係乜，然後唔好即刻做，要諗清楚應該點做，認清方向和步驟先着手做。
• 有深度地整理資料，然後好好present 。
• 做嘢唔同交功課， 老細唔係老師， 唔好要老細幫你check功課找錯處。
• 熟書：例如記得所有operation procedure，記得由你入職以來隊team的decision、execution、result。
• 學好英文，要更好，更好，更好。
• Hangout with winners, not losers. But first, identify who is what.
• Aim to replace your boss. 盡快學會你上司的全套武功，升職跳槽由你揀，邁向自由又近一步。