講完最佳男主角，又點少得最佳女主角？今年最佳女主角新血老戲骨共治一爐。最紅新血必定係《七月與安生》兩位齊齊入圍女主角周冬雨、馬思純，仲有標準靚女湯唯，型爆老氣骨惠英紅與鮑起靜鮑姐，邊個係你心水？
1. 潛力黑馬周冬雨
憑《七月與安生》周冬雨可以話係國內新掘起It-Girl，帶半點古典中國美人氣質，但又潮得起有陣反叛年輕精靈味，瘦小身形形容易Carry不同風格，身為90後佢亦勇於試新風格，例如一套Kenzo輕露纖腰都未必人人敢試，佢又真係着出青春個性。雖然具備時裝可塑性，不過走上金像獎大場合，令人好奇到底如何選衣，故此還是保有觀察態度。
2. 鄰家女孩馬思純
同樣憑《七月與安生》入圍的馬思純屬於典型靚女，同樣勝在後生，但風格唔明顯，亦無太多記憶點，相比馬思純較似鄰家女孩宅男女神。看來品味亦偏向一般偶像清純甜美，金像獎當晚亦多數會揀甜美晚裝，風格不會太突出，但通常甜美上紅毯都好易有時裝車禍，筆者覺得着裝上周冬雨應該較有睇頭。
3. 型格英紅姐
憑《幸運是我》入圍的英紅姐身型夠高挑，打女格肩臂線條靚，兩年前金像獎一套透視黑裙裝修身又有膽，夠高貴又唔老土，真係好唔錯。出道40年老戲骨始於係有功力，雖然仍時有失手，但只要揀剪裁俐落又唔會拖泥帶水顯老款，最有型格就係佢。又例如佢只係着返影今年金像獎特刊套褲裝，都已經嬴晒，今年筆者真心睇好英紅姐。
4. 安全牌湯唯
憑《北京遇上西雅圖之不二情書》的湯唯一向公認係大美女，但時裝功力就少有令人難忘。每次紅地毯相見，多數都係乖乖安全牌，唔會出事但亦唔會令人驚豔，四平八穩簡單一件大方晚裝就過骨。相信今年亦唔會例外，應該都係無咩睇頭，如果揀中件修唔到身，分分鐘時裝車禍有佢份。
Comments