到了我這個年紀，難免都想讀一讀「壽衣 Vogue」！雖然我其實 50 未夠，但玩時裝，一定要「走得前」，早二、三十年諗定一啲都唔過份，我而家這個「中年形象」，其實攞成人身份證嗰日已經design 好！
又或者這樣說，我想「走得前」，是因為不知道會不會「走得早」！反正誰都只得一個 trip，行快啲，睇多啲，抵玩啲。
陰曆September Issue
當然不是真的有這本顛覆性的「大吉利是?口水講過呸呸呸地下時尚聖經」，即使各地啡唇出版界那些穿或不穿 Prada 的男女魔頭，在經濟好景的日子都巧立名目把自己的雜誌一再分拆上市，「XX正刊」之外，還細胞分裂出「XX化妝與護膚」、「XX天橋」、「XX手袋皮鞋」、「XX新娘」、「XX少女」、「XX珠寶」、「XX男人」、「XX孕婦」，連其實唔係幾「啦更」的「XX電影」、「XX旅遊」、「XX星座」、「XX家居」、「XX食譜」我都親眼見過，偏偏就是未見過有人夠膽出明明更關時裝事的「壽衣 Vogue」！這個名字，只是我某年某月某篇舊專欄裏的戲言一句，其實真心恐怖的是， 講吓講吓，唔覺唔覺，忽然又到了真係差唔多要訂閱的年紀了。
若果真有其書，就算唔做忠實讀者，你又會唔會介意在髮型屋做 treatment 時揭吓揭吓？
那天我瞻仰了你的遺容……
本文開頭「到了我這個年紀，難免……」之後，我原本想駁的是：「……難免開始有些同齡同輩的人先走一步」。
我其實唔開心咗好耐，因為有兩三位生前在朋友之間出名著得有型有款的，我去瞻仰遺容時，看到那套衣服那個化妝那款髮型……如果當事人有權決定，一定一定一定不會容許自己以這個造型送客。他們窮一生之力講究儀容穿戴，怎麼會忍受到自己這樣和朋友們告別。
我不是埋怨故友的家人，他們肯定已盡了力為逝者選擇他們眼中認為最好的安排，有些應該甚至還努力回想過「他生前最愛的好像是那套深灰色條子三件頭西裝／她每次穿起那條象牙色麻質抽紗長裙就會自動轉圈」，但我們都明白，你品味好未必遺傳自你的親屬，更不一定能後天感染你的父母配偶子女兄弟姊妹，所以明白禍福無常生死有命的人，為什麼不早一點自己打點好這個告別式的重要環節？
是的，如果你識一早立定遺囑避免有乜冬瓜豆腐之日掀起溏心風暴，如果你會未雨綢繆到一早自己買定棺材山地，揀好將來同另一半定同隻愛貓愛犬合葬，甚至書枱左邊第一個櫃桶裏面已經有個信封入住自選「扶靈名單」同 Peter Marino 操刀的靈堂設計及尺寸圖。點解唔早啲同至愛親朋講低心目中的「夢幻壽衣」，讓將來負責你身後事的人煩少一樣嘢？你自己都想去得靚靚仔仔／女女㗎？何況 Dior 定 Chanel 定 Céline 定 YSL 定 CDG 定阿媽的溫暖牌，都係一句啫！
Last Show for you
另外有個朋友，為了令自己一生都「cool 過人」付出了驚人的努力和龐大的代價，而確實她也做到了，偏偏她離開之後，家人在她名義之下做很多「唔型嘅嘢」，雖然我明這非她預計和掌握之內，我也不會把後來那些「唔型嘅嘢」計到她的成績單內，但還是會為「如果她泉下有知一定會有點……」而惋惜。
所以我一定不會害怕不吉利而早早打點好那個不知何日到的時辰，比如說之前問到我會不會揭「壽衣Vogue」，其實我肯定是不會的，因為首先我就唔明點解要有「壽衣」？壽衣到底係乜？一套專登買嚟俾自己上路往生，同之前 open casket 著嘅衫？這個場合如果要隆重打扮，為什麼不在生前眾多心愛衣服中精選一套 no.1 的？仲要新買一套未試著過嘅薯嘜長衫？正如「做新娘果日唔好試新化妝新髮型，一定要揀以前用過人人都讚嘅 Look」一樣原理，壽衣我梗係揀我人生中著過自我感覺最靚嗰套（當然還要明確交帶落化妝和髮型 guideline，並指定最後一程的 make-up artist 和 hair-stylist），除非你有錢又有計劃到一早去 Valentino 訂咗套「壽衣 Haute Couture」擺定喺衣櫃！
至於我嗰日著乜，我都一早諗好嘞，由於喜歡嘅衫肯肯定唔只一套，所以已經同屋企人講清楚希望佢哋喺「瞻仰遺容」呢個壓軸大 show 中每 15 分鐘幫我換一套，暫定七套，但願比我長命嘅各方好友，見字便喺我喪禮嗰日可以預多少少時間，準時入場，睇埋 encore 先走！唔該晒！
Comments