為保護受訪者，以匿名作答。（資料圖片）
好多人以為化妝師「化幾筆就收幾千蚊，我都識化啦」，但其實化妝師最辛酸之處就係在於化得濃又俾人話無料到，化得自然又落得「無做過嘢」罪名。拍時裝廣告時仲要應付無數個趕死線趕收工黑面明星、模特兒、攝影師，有時 Studio 唔夠人連打燈都要臨時拉夫幫手，好多時無日無夜又周身傷，行內化妝師的辛酸，你又知道幾多？
當初成為化妝師原因？
讀完時裝設計後發現自己好難獨當一面成為設計師，係雜誌社做 Styling Assistant 時，發現自己對Editorial Makeup 有興趣，就決定去拜師學藝。當時半工讀，化妝其實係無得打天才波，好多技巧例如攝影打燈下點化先唔會反光等，有時落錯色 Photoshop 係點都救唔到，並唔係是但去Makeup Counter 買支粉底就搞掂。多數本地上化妝 Full Course 都要上四至五萬蚊，好多學校都聲稱幾單 Job 就搵到返嚟，其實初入行仲要投資一套化妝品用具，就算死慳死抵加埋都貼近八萬，學完後亦無幾張Portfolio 見得人，真正搵到錢可能真係一兩年後，邊有咁易回到本啊…
初入行時「被走數」是否常態？
初入行除非做化妝師助手，又或者去化妝 Brand 做 BA，否則接 Job 都係盲摸摸靠運。好多時做Editorial 都係以俾你儲 Portfolio 得車馬費 500 蚊，有時知你新仲抽你水唔俾現金話過數，最後當然不了了之追極追唔到，所以之前 Facebook 傳新娘化妝師俾新娘走尾數係空穴來風未必無因。好多時新人驚下次無 Job 接或俾人唱，都係一單兩單就算。
化妝被嫌慢？
有時拍廣告影明星，Book 四個鐘遲兩個鐘，得半粒鐘仲要一路食飯一路化，呢頭攝影師催但個星又唔滿意，星滿意啦客又唔滿意，夾係中間就係化妝師！其實化一個 Editorial 靚底妝至少都要一個至個半鐘，每粒瑕疵都要有心機逐粒遮，你估變魔術咩。如果好似 YouTuber 上粉上到幾吋厚當然易化啦，又貼又薄先難啊，半個鐘又要靚爆鏡，邊有可能啊！
化妝師也有工傷嗎？
好多時個客唔聽話，不停低頭玩電話，化妝師就要遷就角度不停壓低條腰，好易有工傷！有時想溫馨提示個客抬起頭，仲會受氣畀人話貼錢買難受我應該要遷就佢，有冇人關心過化妝師都有血有肉！行內人幾乎個個都五癆七傷，腰骨移位、肩頸出事，開工時間浮動、食無定時，好多時有人話接一單Job等於人一個月人工，但唔係日日有 Job 接，每個Job都可能上山下海、開早收夜、日曬雨淋，只能用心做好每單Job嘅辛酸又有冇人理解？
影 Editorial 受模特兒氣？
試過有模特兒要求用全新未開封唇膏，專業上都係要用化妝掃，但模特兒嫌掃唔乾淨要求直接上咀，其實都應該要考慮化妝師感受，當你用過上咀，就算消毒過後又應唔應該再用在其他人唇上？好多客覺得化妝師只係工人，唔會將心比己諗化妝師處境。好些時候又會覺得妝感唔靚，但化妝師會跟時裝編輯 Order 化，試過有模特兒自己去洗手間轉唇膏色加厚睫毛液，又或者走出街影自拍照結果甩晒返上 Studio，編輯問模特兒，都一定會話屬化妝師責任，只好再重新化過，其實都好冤枉但有時為工作順利都少會出聲。所以做化妝師除了 EQ 夠高、執生夠快、身體要好，並唔係想像中畫兩筆就坐係梳化玩電話咁易！
為何仍堅持做化妝師？
每次瘋狂辛苦過後，作品被登上雜誌、廣告板，心裡都會覺得非常有成就感，自己又化了一個不用過度 Photoshop 的好妝。其實星唔星級化妝師都只是宣傳吧，希望入行的人最緊要認清自己是否真正熱愛化妝，每個行業都總有牢騷，但只要記得自己熱愛化妝的初衷，無論經歷多番錯折痛苦，都能在自虐中感受快樂吧！
Comments