永恆的問題：當你知道BFF老公出軌，你會唔會話俾你老死聽？
有無睇錯？無。夜晚海邊或山頂認得個男人車牌，車內人攬攬錫錫爭在未車震，肯肯定狠狠地斷正。男人見唔見到你？見唔到。你有無影低證據？太突然，走唔切，無拍片。講，唔講，講，唔講？同BFF無秘密，講！怕拆散佢個家，唔講！輾轉反側徹夜難眠。
首先，你是否假設了你老死不知情，一定是受害者？假如人家一早知，並接受和默許，呵，你一說穿了，大家都無癮。你可能會怪她有事瞞住你，或者你驚覺和她的價值觀南轅北轍，容忍老公咁對自己同孩子。以後幾個姊妹出來飲tea提起她老公，你倆靦腆相視無言，等一方說謊，裝作沒事但誰心裏都不好受。姊妹團從此疏遠也是人之常情。
好，唔講，但怒火中燒氣難下，直接找上男人門，好有型地拋下一句：「 I know what you’ve done last summer. 我唔會話俾佢聽，但希望你唔好再做傷害我朋友的事！」有義氣兼有創意，但work唔work？一個男人俾一個女人咁鬧法，結果唔會係浪子回頭，唔懷恨在心都偷笑。兩條路，男人可能會話番比老婆知，話你無端端屈佢辱佢，老婆來盤問你，你還是要和盤托出；老婆不問你，很大機會漸漸疏遠你。第二條路，男人唔講番俾老婆知，完全當無事，得啖笑。
往最原始方向想，講！唔想佢蒙在鼓裏，講俾老友知！她信，同老公炒大鑊，老公死口唔認，你白做醜人。她不信，你又拿不出證據，你便是枉作小人。有機會turn her world upside down的說話，真係要由你把口講？
有些夫婦採取“Don’t ask. Don’t tell.”政策，我認為頗文明。老公去滾，老婆勾佬，唔係話得，總之一方不會主動問，一方亦不會主動講，除非有一方有離婚的打算，方可問方可講。講了，知道了，不需要爭執，找離婚律師，文明地分手。過程至少表面上沒有欺騙，沒有偷看手機，沒有私家偵探，兩個人就此陌路，各走他方。這就是完完全全兩個人的事，沒有第三方告密的必要。
Comments